ЛАТЫНЬ СЕГОДНЯ АРИСТЕй XII (2015) С. 13–15 Oratio ad Nicolaum Alexii f. <...> Fedorov nonagenarium, a Michaele Shumilin composita et una cum Nicolao Grintser recitata Cum ab universitatis studiorum nostrae professoribus saepius rogitatus essem, ut oratione Latina docta atque elimata quadam tibi hodie gratularer, uno ore omnium gratissimum tibi atque tui, magister optime, vere amantissimum animum quodammodo exprimens, diu multumque dubitavi, unde inciperem, quidve tanto talique viro satis dignum dicerem, aut cui te compararem, qui, velut inter ignes luna minores, omnes ceteros suo lumine longe vincis? sed postea venit mihi in mentem similitudo, quam aptam esse credo. fuit enim apud Romanos antiquos vir quidam Graecus, omni doctrina imbutus longeque omnibus sui temporis viris doctis praestans, nomine Parthenius Nicaeensis. is primum Romam haud multo post Sullanae annos dominationis deductus statim fere, ut videtur, docere bonas artes coepit, innumeros viros litteratissimos docuit, neque cito desiit. dum Marcus ille Tullius contra Catilinam acerrime pugnabat, Parthenius Cinnam, poetam optimum Catullique amicum, carminum arcana docebat. dum Caesar, Pompeius et Crassus inter se omnem orbem terrarum dividebant, Parthenius cum ipso Catullo, quid esset decorum in lingua Latina, disputabat. dum Caesar a Gallis rediens generum suum bello premebat, Parthenius cum Cornelio Gallo, elegorum Latinorum scriptore principe, de minutissimis linguae leporibus colloquebatur. dum Brutus Cassiusque libertatem sperabant Romanam restituere, a hostibus acerrimis oppressi, Parthenius Vergilii ingenium opibus doctrinae suae immensae alebat. omnia mutabantur, sed non Parthenius. iam Augustus Marco Antonio devicto unici tyranni securus aevum degebat (neque breve fuit, mehercule, aevum!), sed novas iam progenies novis in scholis sine ullo fine Parthenius eruditionis <...>